Д-р Олга ГЕНЧОВА, вонреден професор (во пензија), е родена на 2 август 1940 г. во Лерин (Грција). Средно училиште (природно-математичка гимназија) завршила во Орадеа (Романија) во 1957 г. Истата година се запишала на студии на Хемискиот факултет во Клуж (Романија). Дипломирала во 1962 г. На постдипломски студии се запишала на Природно-математичкиот факултет во Скопје, на насоката за неорганска и аналитичка хемија. Магистрирала во 1979 г., под менторство на проф. д-р Димче Тошев, бранејќи го трудот “Определување на вкупен и растворлив силициум во некои води на СР Македонија”. Во периодот од октомври 1987 до октомври 1988 г. престојувала во Љубљана (на Fakulteta za naravoslovje in tehnologijo), каде што работела врз својата докторска теза “Оксалатометалати на ретките земји”. Докторирала во 1991 г. во Љубљана, под менторство на проф. д-р Јоже Шифтар. По дипломирањето, од 1962 до 1967 г., работела како стручен соработник во Академијата на науките во Темишвар. На Хемискиот институт на Природно-математичкиот факултет во Скопје доаѓа во 1970 г., исто така како стручен соработник. Во 1973 г. е избрана за асистент и во ова звање е преизбирана сè до 1995 г., кога е избрана за доцент по предметот неорганска хемија со основи на неорганска технологија за студентите на двопредметните студии по биологија-хемија. За вонреден професор е избрана во 1999 г. Како асистент ја изведувала практичната и теоретската наставата по предметите: неорганска хемија за студентите по хемија, општа хемија за студентите по биологија, неорганска хемија за студентите по фармација, медицинска хемија за студентите по медицина и стоматологија и неорганска хемија со основи на неорганска технологија за студентите од групата биологија-хемија. Од октомври 2004 се наоѓа во пензија. Во научноистражувачката работа била ориентирана кон електроаналитичките методи со јоноселективни електроди. Во последниве години се занимава со синтеза на неоргански соединенија и со термичка анализа. Пред научната јавност досега се претставила со вкупно 18 трудови: 5 трудови се печатени во меѓународни списанија со impact factor, еден труд е печатен во национално списание надвор од Македонија, 9 трудови се објавени во списанија од РМ и три трудови се печатени во зборници на трудови. Според Science Citation Index, објавените резултати од научната работа на професор Генчова се цитирани 20 пати. Проф. Генчова има презентитано и 16 соопштенија на научни манифестации на интернационални и национални научни собири. Учествувала во изработката на три научни проекти.
Нејзини 5 позначајни трудови се: O.Genčova, J. Šiftar, Synthesis and thermal characteristics of caesium oxalato-metallates of some rare earths, J. Therm.Anal., 44, 1171-1176 (1995); O. Genčova, J. Šiftar, Synthesis and dehydration of double oxalates of rare earths(III) with some monovalent metals, I. Synthesis and thermal behaviour of KLn(C2O4)2·nH2O, J. Therm. Anal., 48, 321-326 (1997); O. Genčova, J. Šiftar, Synthesis and dehydration of double oxalates of rare earths(III) with some monovalent metals, II. Investigations of RbLn(C2O4)2·nH2O, J. Therm. Anal., 48, 877-884 (1997); O. Genčova, J. Šiftar, Hydrazinium oxalato-metallates of rare earths(III), J. Therm. Anal., 55, 52-57 (1999); O. Genčova, J. Šiftar, Sodium oxalato-metallates of rare earths(III) (lanthanons), J. Therm. Anal., 56, 63-69 (1999).