М-р Катерина РИСТЕСКА, асистент (во пензија), е родена на 13 ноември 1933 г. во Струмица. Средно образование завршила во Гимназијата „Јане Сандански” во родното место. Во 1953 г. се запишала на студии на Филозофскиот факултет, група за хемија. Дипломирала на Природно-математичкиот факултет во Скопје во 1958 г. Магистрирала во 1987 г., на матичната институција, бранејќи го трудот „Прилог кон проучувањето на реакцијата на титан(IV) хлорид и супституирани тиобензанилиди”, под менторство на проф. д-р Димче Тошев. По дипломирањето, од 1958 до 1961 г., работела како професор во Гимназијата „Јане Сандански”. Од 1961 до 1963 г. била директор на оваа гимназија, а во периодот 1963-1967 г. била платен пратеник на Собранието на СРМ. Од 1968 г. била асистент на Заводот за неорганска хемија на Институтот за хемија. Изведувала лабораториски вежби по основи на неорганската хемија (за студентите хемичари и фармацевти), општа хемија (за студентите шумари и физичари и за студентите на интердисциплинарните студии за заштита при работа) и медицинска хемија (за студентите медицинари и фармацевти). Нејзината научна работа е од областа на органската хемија. Работела на синтеза и испитување на реакциите на амиди и тиоамиди. Објавила 8 трудови во списанија печатени во Македонија, а десет трудови презентирала во вид на соопштенија (еден на интернационален собир, пет на југословенски и 4 на национални собири во Македонија). Учествувала во работата на три научноистражувачки проекти. Се пензионирала во октомври 1998 г.