Д-р Рубин ГУЛАБОСКИ, насловен доцент, е роден на 29 ноември 1972 г. во Прилеп, Македонија. Основното и средното образование ги завршил во родниот град. Дипломирал на Институтот за хемија на Природно-математичкиот факултет во Скопје, во 1997 г. Во 1998 г. се запишал на постдипломските студии по хемија на ПМФ Скопје. Магистрирал во 2001 г., со одбрана на магистерската работа “Теоретска и експериментална студија на редокс процеси комбинирани со атсорпциски феномени во услови на квадратно-бранова волтамметрија” под менторство на проф. Корнелија Стојанова. Докторирал во 2004 г. на Факултетот за аналитичка хемија и биохемија на Универзитетот во Греифсњалд, Германија, со одбрана на докторската теза “The determination of the Standard Gibbs energies of ion transfer across liquid-liquid interfaces with help of three-phase electrodes”, под менторство на проф. Fritz Scholz. Во април 2006 г. е избран за насловен доцент на Институтот за хемија при ПМФ Скопје. Главно подрачје на научен интерес на Рубин Гулабоски е електрохемијата, при што тој дава значаен удел во развојот на теоријата на волтамметриските техники и моделирањето на разни електродни механизми, како и при проучувањето на феномените на пренос на јони низ течна меѓугранична фаза, како модел за јонските реакции низ мембраните на клетките. Освен тоа, работи и во полето на молекуларно-динамички симулации и на студирањето на интеракциите помеѓу биолошки активни супстанци со волтамметриски и импендансни методи. Тој е еден од пионерите во развитокот на методот на трифазни електроди за студирање на трансферот на јони помеѓу границата на две немешливи течности. Трудовите на Рубин Гулабоски се цитирани 315 пати (според Science Citation Index), со што тој е еден од десетте најцитирани хемичари од Македонија. Рубин Гулабоски бил рецензент на 12 трудови приложени за публикација во интернационални списанија. Презентирал 24 трудови на разни научни манифестации, од кои 14 на интернационални, а 10 трудови на научни манифестации одржани во Македонија. Притоа, бил поканет да држи семинари и предавања на 4 европски универзитети во Германија, Швајцарија и Португалија. Автор е на една монографија на англиски јазик публикувана во 2005 г. (Electrochemistry of immobilized particles and droplets), издадена од издавачката кука Спрингер-Верлаг, а автор e на Electrochemical Dictionary што злезе од печат 2012 г. Бил член на Организационен одбор на 1 научна конференција. Како член, учествувал во реализацијата на 10 научноистражувачки проекти, од кои 4 се интернационални, а 6 се домашни проекти. Добитник е на неколку интернационални стипендии и признанија. Tој е првиот студент од Македонија кој добил стипендија за докторски судии во рамките на програмата на Deutsche Akademische Austauschdienst (DAAD). Добитник е на fellowship за постдокторски студии во Порто, Португалија, како стипендијант на португалската влада. По специјална покана од DAAD учествува (како единствен учесник од Македонија) на средба со нобеловците од областа на хемијата и физиката, во 2002 г. Тој е и еден од десетте стипендирани најдобри млади научници на конгресot во Барселона (септември, 2006), организиран од European/Japanese Molecular Liquids Group. Течно зборува англиски и германски јазик, а има добри познавања и од францускиот и португалскиот јазик.
Рубин Гулабоски е автор на 37 оригинални печатени трудови, од кои 3 се публикувани во списанија од Македонија, а 34 труда се објавени во интернационални списанија со високи импакт фактори (како, на пример, Journal of Physical Chemistry B, Chemistry and Physical Chemistry, Langmuir, Electrochemistry Communications, Journal of Electroanalytical Chemistry, Faraday Discussion, Physical Chemistry Chemical Physics, Electroanalysis, Amino Acids и други). Автор е и на еден ревијален труд во списаниетоChemPhysChem. Дополнително, се јавува и како автор на 5 трудови печатени во зборници на трудови во Македонија. Некои од позначајните публикации на д-р Рубин Гулабоски се дадени подолу: R. Gulaboski, V. Mirčeski, C. M. Pereira, M. Natalia D. S. Cordeiro, A. Fernando Silva, F. Quentel, M. L’Her, M. Lovrić, A comparative study of the anion transfer kinetics across waterѓnitrobenzene interface by means of electrochemical impedance spectroscopy and square-wave voltammetry at thin organic film-modified electrodes, Lagmuir, 22, 3404-3412 (2006); R. Gulaboski, C. M. Pereira. M. N. D. S. Cordeiro, I. Bogeski, E. Fereira, D. Ribeiro, M. Chirea, A. F. Silva, Electrochemical study of ion transfer of acetylcholine across the interface of water and a lipid-modified 1,2-dichlorethan, J. Phys. Chem. B, 109, 12549-12559 (2005); R. Gulaboski, A. Galland, G. Bouchard, K. Caban, A. Kretschmer, P. –A. Carrupt, H. H. Girault, F. Scholz, A comparison of the solvation properties of nitrophenyl octyl ether, nitrobenzene and n-octanol as assessed by ion transfer experiments, J. Phys. Chem. B., 108, 4565-4572 (2004); R. Gulaboski, V. Mirčeski, F. Scholz, An electrochemical method for determination of the standard Gibbs free energy of anion transfer between water and n-octanol, Electrochem. Commun., 4, 277-283 (2002); R. Gulaboski, V. Mirčeski, Š. Komorsky-Lovrić, M. Lovrić, Square-wave voltammetry of cathodic stipping reactions. Diagnostic criteria, redox kinetic measurements, and analytical applications, Electroanalysis, 16, 832-842 (2004).
Престојувал на повеќе европски универзитети и тоа: на Универзитетот во Греифсњалд, Германија во периодот од 2001 до 2004 г. каде ја работел докторската дисертација, на Универзитетот во Лозана, Швајцарија, во периодот јуни-јули 2003 г., како и на Универзитетот во Порто, Португалија, од октомври 2004 до денес, кадешто има позиција на постдокторант. Реализирал и неколку кратки студиски престои на Факултетот за хемија и хемиска технологија во Љубљана, Словенија, во 2001 г., на Универзитетот во Улм Германија во 2003 г., како и на Институтот Руѓер Бошковиќ, во Хрватска, во 2001 г.