Д-р Јосиф ЈАНЧУЛЕВ, редовен професор, еден од легендарните професори на Институтот за хемија, е роден на 17 октомври 1902 г. во Битола. Средно училиште завршил во Солун (во францускиот лицеј „Mission Laique Francaise”). Студирал хемија на филозофските факултети во Heidelberg, Freiburg и Greiswald (Германија). Предавања слушал кај врвни професори од тоа време: Lenard, Curtius, Freudenberg, Staudinger, Hückel (некои од нив биле добитници на Нобеловата награда во својата област). Дипломирал во 1930 г. и веднаш почнал да работи врз својата докторска дисертација „Die Hydrierungsprodukte des a- und b-Hydrindons”. Во 1933 г., под менторство на проф. Walter Hückel, во Greiswald ја одбранил тезата и се здобил со научен степен доктор на науки. По докторирањето, дошол во Скопје и уредил своја приватна лабораторија за испитување минерални и растителни масла, бои, опиум итн. За време на окупацијата не бил во државна служба. Во 1947 г. бил назначен како хемичар во Фабриката за алкалоиди во Скопје. Раководел со Одделението за екстракција и испитување на финалните производи. Во овој период е избран и за хонорарен предавач на Филозофскиот факултет во Скопје. Од 1948 г. е во редовен работен однос на Факултетот. Во 1951 г. е избран за доцент. На Природно-математичкиот факултет во Скопје, во 1958 г., е преизбран во истото звање. За вонреден професор е избран во 1959, а за редовен во 1965 г. Во текот на својот работен век за студентите на групата за хемија изведувал настава по органска хемија и стереохемија, како и по биохемија. Држел посебни курсови по органска хемија за студентите биолози и физичари. Три години предавал органска хемија и на Вишата педагошка школа. Предавал органска хемија и на Техничкиот факултет. Проф. Јанчулев објавил поголем број научни трудови. Повеќепати, во 50-тите и 60-тите години, бил на студиски престои на универзитетите во Загреб, Минхен, Хајделберг и Берлин. Синтезата и својствата на тетракетоните, еден од проблемите со кои се зафатил, и денес сè уште актуелни за испитување. Би можело слободно да се каже дека тој е основоположникот на органската хемија во Македонија. Ја организирал работата во лабораториите по органска хемија на Филозофскиот, Природно-математичкиот и Техничкиот факултет во Скопје. Помогнал во набавката на инструментација и списанија. Објавил над 20 трудови во научни списанија. Бил еден од планерите на сегашниот Институт за хемија (тогаш Хемиски институт). Бил член на управата на Друштвото на хемичарите и технолозите на СРМ и негов претседател. Долго време бил в.д. шеф на Катедрата за органска хемија при Техничкиот факултет во Скопје. Во октомври 1975 г. е пензиониран. Почина во октомври 1985 г. Неговите колеги и поранешни студенти со гордост се сеќаваат на него како на професор и хемичар од највисок ранг и ги помнат неговиот благороден лик, ведрината и смислата за хумор - хумор полн со свежина.
