Д-р Иван ПЕТРОВ, редовен професор, е роден на 3 јули 1922 г. во с. Големо Илино (Демир Хисар). Средно училиште завршил во Битола. Учествувал во НОБ (бил на разни раководни должности, вклучително командант на баталјон). Во 1946 г., формално сè уште во армијата, се запишал на групата за хемија на штотуку формираниот Филозофски факултет во Скопје. Во 1949 г. ги продолжил студиите на Природно-математичкиот факултет во Белград, каде што дипломирал во 1951 г. Во 1958 г. престојувал во Љубљана, каде (под раководство на проф. Душан Хаџи, еден од врвните светски авторитети во областа на спектроскопијата) работел на својата докторска дисертација. Докторирал на Природно-математичкиот факултет во Скопје во 1960 г. Бил на научни усовршувања на King’s College во New Castle, Англија (10 месеци) и на Fisk University, Nashwille, САД (13 месеци). По дипломирањето, бил избран за асистент на Катедрата за хемија на Филозофскиот факултет во Скопје. Во 1960 г. бил избран за доцент, во 1966 за вонреден и во 1961 г. за редовен професор на Природно-математичкиот факултет во Скопје. Во 1987 г. е пензиониран. Како асистент изведувал вежби од повеќе практикуми. Држел настава по физичка хемија II (за студентите по хемија) и спектроскопија (за студентите по физика). Настава по физичка хемија одржувал и во Приштина. Во 1963 и 1964 г. кога, по катастрофалниот земјотрес, практично, замрел животот во Скопје, тој (како продекан на Природно-математичкиот факултет) вложил огромни усилби за повторно создавање услови за работа. Во тоа време е набавена и првата модерна опрема од областа на молекулската спектроскопија. Може слободно да се каже дека, освен што е основоположник на спектроскопијата кај нас, проф. Петров е, покрај проф. Тошев, најзаслужниот за хемијата во Македонија во почетниот период на нејзиниот развој. Животната определба на проф. Петров се истражувања од областа на молекулската спектроскопија. Заедно со соработниците објавил голем број трудови, во списанија со врвно реноме: Spectrochimica Acta, Spectroscopy Letters, Journal of Molecular Structure, Zeitschrift für Anorganische und Allgemeine Chemie итн. Вкупно објавил 45 научни трудови: 21 надвор од Македонија, од кои 15 во списанија со фактор на влијание и 17 во списанија во Република Македонија. Автор е и на голем број соопштенија. Држел предавања на многу универзитети во светот. Бил пленарен и секциски предавач на повеќе национални и југословенски манифестации од областа на хемијата и спектроскопијата. Бил и раководител на голем број научноистражувачки проекти. Бил продекан на Природно-математичкиот факултет во Скопје, декан на Хемискиот факултет (1979-1981 и 1981-1983 г.) и шеф на Институтот за хемија (1985-1987 г.). По негова иницијатива (кон крајот на шеесеттите години) донесена е одлука Природно-математичкиот факултет во Скопје да профилира дипломирани инженери по физика и хемија. Заслужен е, покрај другото, и за организирање на југословенското советување по општа и применета спектроскопија (во 1974 г.) кое оттогаш станува и научна (а не само апликативна) манифестација. Добитник е на Медал на трудот, Орден на трудот со сребрени зраци, Орден на трудот со златен венец и на Наградата „11 Октомври” за животно дело. Почина во октомври 2004 г. Неговите колеги и поранешни студенти со гордост се сеќаваат на него како на професор од највисок ранг и ги помнат неговиот благороден лик и ведрината.
