Д-р Корнелија СТОЈАНОВА, редовен професор (во пензија), е родена на 24 декември 1936 г. во Штип. Средното образование го завршила во родното место. Во учебната 1955/56 г. се запишала на студии по хемија на Филозофскиот факултет во Скопје. Дипломирала во 1960 г. на Природно-математичкиот факултет во Скопје. Магистерската работа „Испитување на комплексите на јоните од олово и кадмиум во раствори од монохлоркилибарна киселина” ја работела под менторство на проф. д-р Благоја Топузовски. Магистрирала во 1978 г. на Хемискиот факултет во Скопје. Докторската дисертација „Поларографска студија на реакцијата на паладиум хлорид со урина и со некои нејзини состојки” ја работела под менторство на проф. д-р Д. Јовановиќ (Белград) и проф. д-р Благоја Топузовски и ја одбранила во 1983 г. на Хемискиот факултет во Скопје. Во 1960 г. е вработена во Електрометалуршкиот комбинат „Југохром” во Јегуновце. Во 1962 г. е примена за асистент на Хемискиот институт при Природно-математичкиот факултет во Скопје. Во ова звање е преизбирана повеќепати. Во 1983 г. е избрана за доцент на Хемискиот факултет во Скопје. На Природно-математичкиот факултет во Скопје е избрана за вонреден (1988 г.) и редовен професор (1993 г.). Пензионирана е во октомври 2001 г. Изведувала настава по физичка хемија I и II (за студентите од Рударско-геолошкиот факултет во Штип), одбрани поглавја од електрохемијата (за студентите од аналитичко-структурната насока на групата хемија) и физичка хемија (за студентите на двопредметните студии по биологија-хемија). На постдипломските студии по хемија и е доверено изведување настава по предметот современи електроаналитички методи. Главно подрачје на научен интерес и е од областа на електрохемијата и аналитичката хемија. Специјалност и е поларографскиот метод. Досега објавила 33 трудови (8 во меѓународни списанија, 13 во домашни списанија, 8 трудови се објавени во Зборници на трудови од конференции во странство и 4 трудови се објавени во зборници на трудови од домашни конференции). Нејзините трудови досега се цитирани 13 пати. Презентирала и 66 соопштенија (50 на интернационални собири и 16 на собири во Македонија). Била рецензент на 2 трудови во странски списанија и на 2 труда во домашни списанија. Била претседател на Научен одбор на една научна конференција и член на Научен/Организационен одбор на 5 научни конференции. Била и уредник на еден Зборник на трудови на научна конференција. Вкупниот број научноистрaжувачки проекти во кои учествувала е 15, од кои како раководител на два домашни проекти, член на 3 меѓународни проекти и на 10 домашни проекти. Била ментор на еден кандидат за магистерска работа и на 10 дипломски работи. Од 1989 до 1991 г. била раководител на Заводот за физичка хемија. Добитник е на Златна плакета во 1989 г., по повод 40 – годишнината од основањето на Универзитетот „Св. Кирил и Методиј”, како и плакета по повод 50 години Природно-математички факултет (1946-1996).
Позначајни 5 трудови на проф. Стојанова се: К. Стојанова, Љ. Стојадинови¸, С. Петровска-Јованови¸, Реакција на метилирани деривати на хистидин со паладиум хлорид, Мак. мед. преглед, 5-6, 143-146 (1991); К. Стојанова, С. Петровска-Јованови¸, Б. Јорданоски, Определување на талиум во водите за пиење со примена на диференцијален пулс анодна стрипинг волтаметриски метод, Прилози, Одделение заматематичко-технички науки, МАНУ, XIV, 43-52 (1993); V. Mirčeski, S. Petrovska-Jovanović, K. Stojanova, B. Jordanoski, Electrochemical behaviour of selenium(IV) during electrolysis by square-wave voltammetry after deposition on a hanging mercury drop electrode, J. Serb. Chem. Soc. 59, 573-580 (1994); K. Stojanova, R. Gulaboski, V. Mirčeski, S. Petrovska-Jovanović, Adsorptive stripping square-wave voltammetry investigation of creatine, Anal. Lett. 32, 2937-2950 (1999); V. Mirčeski, R. Gulaboski, S. Petrovska-Jovanović, K. Stojanova Caracterization of the redox reactin of V(V) in amonia buffers by SWV, Portugal Electrochemcal Acta, 19, 25-41 (2001).