Д-р Владимир ПЕТРУШЕВСКИ, редовен професор, е роден на 16 септември 1954 во Скопје, кадешто ги завршил основното (1969) и средното (1973) образование. Во учебната 1973/74 г. се запишал на студии по применета хемија, на Природно-математичкиот факултет во Скопје (ПМФ). Дипломирал во 1978 г. на Хемискиот факултет во Скопје. Магистрирал („Вибрациони спектри на хидратите на некои двојни сулфати и селенати”, 1988) и докторирал („Испитување на системи со тетраедарски и квазитетраедарски јони: спектар–структурни корелации и вибрациони спектри на некои (ЅО4)х(ЅеО4)1-х соединенија”, 1990) на Институтот за хемија при ПМФ, под менторство на акад. Бојан Шоптрајанов. Во 1980 г. бил избран за помлад асистент; во 1989 г. за асистент; во 1991 г. за доцент, во 1996 г. за вонреден и во 2001 г. за редовен професор на ИХ при ПМФ, Скопје. Изведувал настава по предметите: радиохемија, методи на хемиското експериментирање (предавања и вежби), методи за определување молекулски структури (држел настава од 1992/93 до учебната 1997/98 г.). На постдипломските студии на Институтот за хемија е одговорен наставник за курсот експериментот во наставата по хемија. Изведувал и вежби по предметите: физичка хемија 1 и 2, структура на атоми, структура на молекули, одбрани поглавја од физичката хемија (за студентите од РГФ Штип), одбрани поглавја од физичката хемија (за студентите од биохемиско-физиолошката насока на Институтот за биологија при ПМФ), статистичка обработка на експерименталните резултати, хемиско школско експериментирање/методи на хемиско експериментирање, радиохемија. Главни подрачја на научен интерес на проф. Петрушевски се истражувања во областа на образованието по хемија, особено кон методиката на хемиското експериментирање. Други подрачја на научен интерес: вибрационо-спектроскопски и структурни истражувања на водородно сврзани системи; вибрационо-спектроскопски и структурни испитувања на мали молекули со висока симетрија. Проф. Петрушевски објавил вкупно 145 печатени трудови (тука се вклучени и печатените коментари, писма и научно-популарни трудови). Од овој број, 91 труд е печатен во списанија надвор од Македонија (од нив 67 во списанија со импакт фактор), 37 во списанија печатени во Македонија, 13 труда се објавени во зборници на трудови надвор од Македонија и 4 во зборници на трудови од македонски манифестации. Презентирал и 94 трудови на научни манифестации. Од ова, надвор од Македонија се презентирани 56 реферати (од нив еден пленарен и два секциски), а во Македонија 38 (од нив еден пленарен). Автор е на голем број компјутерски програми од струката. Трудовите на проф. Петрушевски се цитирани вкупно 254 пати. Бил рецензент на дваесетина трудови во странски списанија. Од 2004 г. е и проверувач (checker) на демонстрации за Journal of Chemical Education. Бил рецензент на неколку трудови објавени во домашни списанија. Автор/коавтор е на два универзитетски учебника и на еден патент. Заедно со помл. асист. Марина Стојановска изведувал настава (на англиски јазик) за учениците од меѓународна матура (гимнaзија “Ј. Б. Тито”) во Скопје. Бил претседател на Научниот одбор на Конгресот на хемичарите и технолозите на Македонија, одржан во 2002 г., во Скопје. Член е на Уредувачките одбори на новооформените научни списанија: World Journal of Chemistry, (http://www.idosi.org/wjc/wjcmembers.htm) и Global Journal of Molecular Sciences. Учествувал во изработката на голем број научно-истражувачки проекти. На шест од нив (од кои 3 меѓународни) бил и раководител. Во моментов конкурира на проект чија цел се различни истражувања во образованието по хемија. Бил ментор на 5 докторанди, 3 магистранди и на голем број дипломци. Бил раководител на Заводот за физичка хемија (1995–1997) и декан на ПМФ (1997–1999). Бил или е член на: Техничкиот комитет на COST Chemistry (2004–2006); Советот за метрологија на РМ (мај 2005–); Советот за развој и финансирање на високото образование (декември 2003–); комисијата за изработка на правна рамка за научноистражувачка дејност (март–јуни 2006); Советот на Град Скопје (април 2005–); претседателството на Народна техника на Македонија (2002–2006); натпреварувачките комисии по хемија во рамките на движењето Науката на младите (1985–2003). Претседател е на натпреварувачките комисии по хемија на олимпијадата “Дејан Димовски” (2000–) и член на соодветните комисии за средношколски натпревари (2002–). Одлично го владее англискиот, а солидно (говори и чита) грчкиот јазик. Се служи со стручната литература на речиси сите словенски јазици. Во 2004 год му е доделена диплома за почесен член на Друштвото на физикохемичарите на Србија. Од 1 октомври 2021 година е во пензија.
Остварил кратки студиски престои на Kemijski Inštitut Boris Kidrič, Ljubljana (1980); King’s College, London (1988, 1992, 1994, 1995, 1997, 2001); George Mason University, Fairfax, USA (2004).
Негови позначајни публикации се: V. Petruševski, K. Trenčevski, A tensorial approach to the description of molecular distortions. I. Tetrahedral molecules, Croatica Chemica Acta, 59, 867–881 (1986); V. Petruševski, W.F. Sherman, Harmonic frequencies and anharmonicity constants for the antisymmetric stretching vibrations of isomorphously isolated SO4 ions in K2CrO4, Journal of Molecular Structure, 219, 171–176 (1990); B. Šoptrajanov, V. M. Petruševski, Vibrational spectra of hexaaqua complexes. IV. Multiple bands in the HOH bending region of some alums, Journal of Molecular Structure, 293, 101–104 (1993); V. M. Petruševski, S. Aleksovska, Dependence of the crystal structure parameters on the size of the structural units in some isomorphous/isostructural series, Croatica Chemica Acta, 72, 71–76 (1999); V. M. Petruševski, M. Monković, M. Najdoski, Alternative demonstrations of slow processes II. A video clip of one-dimensional waves in the hypochlorite–iodide–water system, The Chemical Educator, 9, 39–41 (2004).
